ភ្នំពេញ៖ នៅសល់តែ ៧១៨ ថ្ងៃទៀតប៉ុណ្ណោះនឹងឈានដល់ពិធីបើកព្រឹត្តិការណ៍កីឡាស៊ីហ្គេម ឆ្នាំ ២០២៣ នៅកម្ពុជាហើយ ខណៈដែលគណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍ ឆ្នាំ២០២៣ (CAMSOC) បាននឹងកំពុងខិតខំប្រឹងប្រែងយ៉ាងសកម្ម ដើម្បីធានាឱ្យព្រឹត្តិការណ៍កីឡាដ៏ធំប្រចាំតំបន់នេះ ដំណើរការដោយរលូន ជោគជ័យ និងជាកេរ្តិ៍ឈ្មោះរបស់កម្ពុជាក្នុងនាមជាម្ចាស់ផ្ទះ។
ទន្ទឹមនឹងដំណើរការឥតឈប់ឈរនៃការស្ថាបនាសាងសង់ពហុកីឡដ្ឋានជាតិ “មរតកតេជោ” ដែលជាទីតាំងដ៏សំខាន់ក្នុងការប្រារព្ធពិធីបើក-បិទព្រឹត្តិការណ៍ SEA GAME ព្រមទាំងជាទីតាំងប្រកួតកីឡាសំខាន់មួយចំនួននោះ គណៈកម្មាធិការ CAMSOC ក៏បានសំឡឹងរកទីតាំងមួយចំនួនផ្សេងទៀត សម្រាប់បម្រើដល់ការប្រកួតវិញ្ញាសារផ្សេងៗទៀតនាឆ្នាំ២០២៣ ខាងមុខនេះផងដែរ។
ក្រៅតែពីពហុកីឡដ្ឋានជាតិ “មរតកតេជោ” ទីតាំងសំខាន់ៗ ព្រមទាំងខេត្តមួយចំនួននឹងត្រូវប្រើប្រាស់សម្រាប់ការប្រកួតប្រជែងរួមមាន៖ ពហុកីឡដ្ឋានជាតិអូឡាំពិក, ផ្សារទំនើប អ៊ីអនម៉ល សែនសុខ, មជ្ឈមណ្ឌលពិព័រណ៍អន្តរជាតិជ្រោយចង្វារ, សាលដំបូលទូក នៃសាកលវិទ្យាល័យភូមិន្ទភ្នំពេញ និងខេត្តមួយចំនួនដូចជា ខេត្តសៀមរាប ខេត្តព្រះសីហនុ ខេត្តកែប និងខេត្តកំពង់ធំជាដើម ក៏សុទ្ធតែជាគោលដៅត្រៀមយ៉ាងសំខាន់ដូចគ្នា។ នេះបើយោងតាមប្រភពពីអគ្គនាយកដ្ឋានកីឡា។
យ៉ាងណាក្តី គេនៅមិនទាន់ប្រាកដនៅឡើយថាទីតាំងដែលបានលើកឡើងខាងលើ នឹងត្រូវទទួលបន្ទុករៀបចំប្រភេទកីឡាណាខ្លះឡើយ ខណៈកិច្ចប្រជុំនាពេលកន្លងមកបានកំណត់យកខេត្តសៀមរាប សម្រាប់រៀបចំការប្រកួតប្រណាំងកង់, ខេត្តព្រះសីហនុ រៀបចំការប្រកួតម៉ូតូទឹក និងកីឡាទូកក្ដោង, ហើយខេត្តកែប ត្រូវប្រកួតទ្រីយ៉ាងត្លុង ស្របពេលដែលព្រឹត្តិការណ៍កីឡាស៊ីហ្គេម ប្រារព្ធពីធីបើក និងចាប់ផ្តើមនៅថ្ងៃទី០៥ ខែឧសភា ឆ្នាំ ២០២៣ ខាងមុខ៕
